مواجهة حتمية

كل حاجة بقيت بعملها غصب عني, باكل غصب عني اكل انا بكرهه و بعمل حاجات بكرها و بدرس حاجات بكرهه -و دا طبيعي ف مصر- بس عارفة السؤال اللي لازم يتسأل, و علي اية كل دا؟ اية اللي مصبرني؟ بحاول ادور علي اجابة انا برده عارفاها, جبانة. و دي اكتر حاجة منطقية. انا حطة خطط كتير للمستقبل  بس للأسف كلهم بيدورو حوالين نفس المحور و الطريق بس مفيش اي خطط لو الطرق طلع مفترق طرق و ممشيش معايا طوالي و دي حاجة انا شايلاها من دماغي خالص دلوقتي بحاول اقنع نفسي اني هقدر اوصل و اقدر اكون اشجع من كدا بس دايما باحبط نفسي و باثبت اني ضعيفة و اسوا من كدا, اني عادية. انا عندي مليون فكرة و مليون طريقة اقدر احقق بيها حلمي بس خايفة بردو اطلع بحلم بجد اعرف ناس كتير محققتش حلمها و يأست و استسلمو و سلمو امرهم لربنا. لازم الواحد يكون مميز فأي حاجة مهما كانت تافهة المهم انها تكون موجودة. الموهبة, الطموح, نخلص من الجين و الخوف.

مجرد راي

من غير مبالغة انا من الناس الي الثورة غيرتها 360 درجة أنا الي عمري ما مشيت في مظاهرة ومنزلتش فالثورة بس بدافع عنها فكل مناسبة. بتكلم في السياسة في الي اعرفة بس بحاول مفتيش بقرا فيها كتير بحاول افهم علي طول. انا اكيد لو عليا هنزل بس اكيد اهلي مش بيوافقو و دي مشكلة لبنات كتير ممكن ااكد لأي حد ان %60 من البنات الي بتنزل اهلها ميعرفوش. لما شوفت ان الناس بتموت عشان بيدافعو عن ابسط حقوقهم الي اتسحل و الي عينة ضاعت والي اتعذب فقسم و الي جثتة اترمت فالزبالة و الي دهسة جيش بلدة و الي مات فماتش كورة غدر و ال53 طفل الي دهسهم طفل من الاهمال. طب امتي الدم دا هيوقف؟ لما الي قتل يتحاكم؟ طب و امتي هيتحاكم؟ لما نفوق و الناس كلها تستوعب اننا عايشين فبلد القضاء فيها غير عادل. الامل بيقل بس ربنا كبير.

طبق الاصل

اعتقد ان الفرق ما بين امريكا و مصر عقليا انهم بيهتمو بالتميز الفردي كل واحد لية شكل ودماغ هنا اتربينا علي اننا كلنا نكون دماغ واحدة و المميز دا غلط كنا يقولولنا زمان اعمل زي فلان عشان تكون كويس اعملي زي دي عشان مش عارفة اية و كبرنا علي كدة. في دلوقتي مسلسل بيتعرض في امريكا اسمو (جلي) سواء اختلفت او اتفقت معاه هو بيعرض فكرة ان مش جريمة ان الواحد يكون مميز ف اي حاجة بقي مثلا مش شرط لو في ولد بيحب يعرف حاجات فالموضة انو مش مظبوط و مش شرط البنت الي مش بتتكلم كتير بس بتحب تكتب تكون معقدة لية بندفن مواهب كتير جديدة لاسباب غير منطقية. في مدرس خدت عندة مادة علم النفس كان بيفهم البنات الي قاعدين ان الي بيدخلو اعلام او فنون سواء جميلة او تطبيقية دول مش كويسين و صايعين و بيقلعو الحجاب الي اقصدو هنا ان العقول بتتبرمج علي فكرة واحدة و هي كره كل شي جديد حتي من غير ما نعرف حلو ولا وحش و بطريقة غير مباشرة بتخلي التعصب للافكار يزيد. طب ماهو لو في 55 مليون مهندس و دكتور هنعمل بيهم اية اذا كان مشريعهم مش بتتنفذ و الناس مش بتتعالج كويس. طب ما كدة محدش يلوم علي الي بيهاجرو عشان نش حاسين ان ليهم لازمة فالبلد. بلد زي امريكا بتقدر العلم و عشان كدة بيجولها من العالم كلة يدرسو فيها و طبعا المصلحة مشتركة هما يحققو طموحهم العلمي و امريكا تزيد فالتطور. انا شايفة ان الامل الوحيد في الاهل و التربية عشان مفيش امل فالتعليم بالنظام الغبي و المناهج السطحية هتدمر مخ الطالب و تخلية يحفظ معلومات ملهاش لزمة و مش هتفيدو فحياتو فالاهل هما الي يقدرو ينمو اي موهبة عند اولادهم و يشاجعوهم